💰 பணமோசடி, நிதிக் குற்றங்களுக்கு எதிராக 3 புதிய சட்டங்கள் அமுல் – சபாநாயகர் சான்றுரை

பணம் தூயதாக்கல், சந்தேகத்திற்கிடமான நிதிப் பரிவர்த்தனைகள் மற்றும் பயங்கரவாத நிதியளிப்பை கட்டுப்படுத்தும் வகையில் மூன்று முக்கிய திருத்தச் சட்டமூலங்களுக்கு சபாநாயகர் வைத்தியர் ஜகத் விக்கிரமரத்ன இன்று (04) சான்றுரையளித்துள்ளார்.

இதன்படி, பின்வரும் மூன்று சட்டமூலங்கள் சட்டங்களாக அமுலுக்கு வந்துள்ளன:

• பணம் தூயதாக்கல் தடை (திருத்தச்) சட்டம் – 2026ஆம் ஆண்டின் 16ஆம் இலக்கம்
• நிதிசார் கொடுக்கல்வாங்கல்களை அறிக்கையிடல் (திருத்தச்) சட்டம் – 2026ஆம் ஆண்டின் 17ஆம் இலக்கம்
• பயங்கரவாதி நிதியளிப்பை ஒடுக்குதல் மீதான சமவாய (திருத்தச்) சட்டம் – 2026ஆம் ஆண்டின் 18ஆம் இலக்கம்

🔍 பணமோசடிக்கு எதிரான சட்டம் வலுப்படுத்தல்

பணம் தூயதாக்கல் தடைச் சட்டத்தின் திருத்தங்களின் மூலம், நாட்டில் பணமோசடியை தடுப்பதற்கான தற்போதைய சட்டக் கட்டமைப்பு மேலும் வலுப்படுத்தப்பட்டுள்ளது.

இதன் முக்கிய அம்சங்களாக,

• பணம் தூயதாக்கல் குற்றங்களின் வரம்பை விரிவுபடுத்துதல்;
• அடிப்படைக் குற்றத்தில் தண்டனை வழங்கப்படாத நிலையிலும் பணம் தூயதாக்கல் தொடர்பில் சட்ட நடவடிக்கை எடுக்க வழிவகை செய்தல்;
• சந்தேகத்திற்கிடமான சொத்துக்களை தற்காலிகமாக முடக்குதல்;
• குற்றச் சொத்துக்களை பறிமுதல் செய்வதற்கான நடைமுறைகளை வலுப்படுத்துதல்;
• விசாரணை அதிகாரங்களை விரிவுபடுத்துதல்;
• சர்வதேச ஒத்துழைப்பை மேம்படுத்துதல்;
• பணமோசடி குற்றங்களுக்கான தண்டனைகளை அதிகரித்தல்

ஆகியவை குறிப்பிடத்தக்கவை.

💳 நிதிப் பரிவர்த்தனைகளுக்கு புதிய கட்டுப்பாடுகள்

நிதிசார் கொடுக்கல்வாங்கல்களை அறிக்கையிடல் சட்டத்தின் திருத்தங்கள் மூலம், பணமோசடி, பயங்கரவாத நிதியளிப்பு மற்றும் பேரழிவு ஆயுதப் பெருக்கத்திற்கான நிதியளிப்பை தடுப்பதற்கான சர்வதேச தரநிலைகளுடன் இலங்கையின் சட்டக் கட்டமைப்பை மேலும் இணைக்கும் நடவடிக்கைகள் மேற்கொள்ளப்பட்டுள்ளன.

இதன் கீழ் மெய்நிகர் சொத்து சேவை வழங்குநர்களையும் நிதி வணிகம் தொடர்பான சட்ட வரையறைக்குள் கொண்டுவருவதற்கான ஏற்பாடுகள் செய்யப்பட்டுள்ளன.

மேலும், நிதிப் புலனாய்வுப் பிரிவின் அதிகாரங்கள் மற்றும் பொறுப்புகளை வலுப்படுத்துவதுடன், பரிவர்த்தனைகளை இடைநிறுத்தும் உத்தரவின் காலத்தை 7 நாட்களில் இருந்து 14 வேலை நாட்களாக நீடிக்கவும் ஏற்பாடு செய்யப்பட்டுள்ளது.

🚨 பயங்கரவாத நிதியளிப்புக்கு எதிராக கடும் நடவடிக்கை

பயங்கரவாதி நிதியளிப்பை ஒடுக்குதல் தொடர்பான திருத்தச் சட்டத்தின் மூலம், பயங்கரவாதத்திற்கு நிதியளிப்பதை தடுப்பதற்கான இலங்கையின் சட்டக் கட்டமைப்பு மேலும் வலுப்படுத்தப்பட்டுள்ளது.

ஐக்கிய நாடுகள் சபையின் தீர்மானங்கள் மற்றும் சர்வதேச தரநிலைகளுக்கு அமைவாக நிதித் தடைகளை நடைமுறைப்படுத்துவதற்கும் இந்தத் திருத்தங்கள் வழிவகுக்கும் என தெரிவிக்கப்பட்டுள்ளது.

மேலும், எதிர்காலத்தில் இலங்கை எதிர்கொள்ளவுள்ள சர்வதேச பரஸ்பர மதிப்பீட்டிற்கு தயாராகவும், நிதி நடவடிக்கை செயலணி (FATF) தொடர்பான சர்வதேச கடப்பாடுகளை நிறைவேற்றவும் இந்தச் சட்டத் திருத்தங்கள் உதவும் என எதிர்பார்க்கப்படுகிறது.

🇱🇰 மூன்று சட்டங்களும் இன்று முதல் அமுல்

இதன்படி, சபாநாயகர் சான்றுரையளித்த மூன்று சட்டமூலங்களும் முறையே 2026ஆம் ஆண்டின் 16, 17 மற்றும் 18ஆம் இலக்க சட்டங்களாக இன்று முதல் அமுலுக்கு வந்துள்ளன.

இந்தச் சட்டங்கள் நாட்டின் நிதி முறைமையின் வெளிப்படைத்தன்மையை வலுப்படுத்துவதுடன், பணமோசடி, பயங்கரவாத நிதியளிப்பு மற்றும் நிதிக் குற்றங்களை கட்டுப்படுத்துவதற்கான சட்ட நடவடிக்கைகளையும் மேலும் வலுப்படுத்தும் என எதிர்பார்க்கப்படுகிறது.