“We Will Kill Trump” – உலகை அதிரவைத்த ஈரானின் புதிய விளம்பர பலகை

டெஹ்ரானில் ட்ரம்பை குறிவைத்து சர்ச்சைக்குரிய விளம்பர பலகை – உலக கவனம் ஈர்ப்பு

அமெரிக்க ஜனாதிபதி டொனால்ட் ட்ரம்பை குறிவைத்து, “We Will Kill Trump” என்ற ஆங்கில வாசகத்துடன் கூடிய பிரம்மாண்ட விளம்பர பலகை ஈரான் தலைநகர் டெஹ்ரானில் காட்சிப்படுத்தப்பட்டுள்ளது

. இந்த விளம்பர பலகை சர்வதேச அரசியல் வட்டாரங்களில் பெரும் கவனத்தை ஈர்த்துள்ளது.

டெஹ்ரானின் எங்கெலாப் சதுக்கத்தில் அமைக்கப்பட்டுள்ள அந்த பலகையில், கருப்பு நிற சவப்பெட்டிக்குள் டொனால்ட் ட்ரம்ப் படுத்திருப்பது போன்ற காட்சி சித்தரிக்கப்பட்டுள்ளது. அவரது தலைமுடி சீர்குலைந்த நிலையிலும், கண்களும் வாயும் மூடிய நிலையிலும், சிவப்பு நிற டையுடன் கைகளை மார்பின் மீது வைத்தபடியும் வடிவமைக்கப்பட்டுள்ளது. சவப்பெட்டியின் மீது பாரசீக மொழியிலும் ஆங்கிலத்திலும் “We Will Kill Trump” என்ற வாசகம் எழுதப்பட்டுள்ளது.

இந்த காட்சியமைப்பு, அண்மைய மோதல்களில் உயிரிழந்ததாக ஈரான் கூறும் தனது தலைவர்கள் மற்றும் அதிகாரிகளுக்கு அஞ்சலி செலுத்தும் அரசியல் பிரச்சாரத்தின் ஒரு பகுதியாக உருவாக்கப்பட்டதாக கூறப்படுகிறது. பின்னணியில் உயிரிழந்தவர்களை நினைவுகூரும் வாசகங்களும் துக்கத்தை பிரதிபலிக்கும் வடிவமைப்புகளும் இடம்பெற்றுள்ளன.

அரசியல் மற்றும் புரட்சிகர கருத்துகளை மக்களிடம் கொண்டு சேர்க்கும் நோக்கில் ஈரான் நீண்ட காலமாக இவ்வாறான பெரிய அளவிலான விளம்பர பலகைகளை பயன்படுத்தி வருகிறது. குறிப்பாக அமெரிக்கா மற்றும் இஸ்ரேலுடனான பதற்றம் தீவிரமடைந்துள்ள சூழலில், தலைநகர் டெஹ்ரானில் இதுபோன்ற அரசியல் பிரச்சாரங்கள் அதிகரித்துள்ளன.

இதற்கு முன்னரும், டொனால்ட் ட்ரம்பை விமர்சிக்கும் வகையில் “The Breaking Point” என்ற வாசகத்துடன் அவரது வாய் தைக்கப்பட்டிருப்பது போன்ற விளம்பர பலகைகளும், அமெரிக்க இராணுவத்தை விமர்சிக்கும் காட்சிகளும் ஈரானில் காட்சிப்படுத்தப்பட்டிருந்தன.

அதேவேளை, ஈரானில் வெளியாகும் ஒரு பழமைவாத நாளிதழ், பழிவாங்க வேண்டியதாகக் கூறப்படும் வெளிநாட்டு தலைவர்களின் பட்டியலையும் வெளியிட்டுள்ளதாக தகவல்கள் தெரிவிக்கின்றன. அந்தப் பட்டியலில் டொனால்ட் ட்ரம்ப், இஸ்ரேல் பிரதமர் பெஞ்சமின் நெதன்யாகு மற்றும் பிரித்தானிய பிரதமர் கீர் ஸ்டார்மர் உள்ளிட்டோரின் பெயர்களும் இடம்பெற்றுள்ளதாக கூறப்படுகிறது.

இந்த புதிய விளம்பர பலகை, ஏற்கனவே பதற்றமான நிலையில் உள்ள ஈரான்–அமெரிக்க உறவுகளை மேலும் சிக்கலாக்கக்கூடும் என சர்வதேச அரசியல் ஆய்வாளர்கள் மதிப்பிடுகின்றனர்.