நுரைச்சோலையின் மூன்று அலகுகளும் முடக்கம் – மின்வெட்டு வருமா?”

நுரைச்சோலை மின் உற்பத்தி நிலையத்தின் மூன்று அலகுகளும் செயலிழப்பு – நாட்டில் மின்வெட்டு அமல்படுத்தப்படுமா?

நுரைச்சோலை நிலக்கரி மின் உற்பத்தி நிலையத்தின் மூன்று மின் உற்பத்தி அலகுகளும் செயலிழந்துள்ளதால், நாட்டில் குறைந்தபட்ச அளவிலான மின்வெட்டை அமல்படுத்த வேண்டிய நிலை ஏற்படலாம் என எரிசக்தி நிபுணர் விதுர ரலபனாவா தெரிவித்துள்ளார்.

செயலிழந்துள்ள அலகுகளில் முதலாவது அலகை மீண்டும் வழமைக்குக் கொண்டுவருவதற்கு குறைந்தது நான்கு முதல் ஐந்து நாட்கள் தேவைப்படலாம் என்றும் அவர் சுட்டிக்காட்டியுள்ளார்.

இந்தத் திடீர் செயலிழப்பு காரணமாக, தேசிய மின் வலையமைப்புக்குக் கிடைக்க வேண்டிய சுமார் 900 மெகாவாட் மின்சாரம் இழக்கப்பட்டுள்ளதாகவும் அவர் குறிப்பிட்டுள்ளார்.

பகல் நேரங்களில் சூரியசக்தி மூலம் மின்சாரம் உற்பத்தி செய்யப்படுவதால், அந்த நேரத்தில் பாரிய பாதிப்புகள் ஏற்படுவதற்கான வாய்ப்புகள் குறைவாக இருக்கலாம். இருப்பினும், வாரத்தின் முதல் நாளான திங்கட்கிழமை முதல் மின்சாரத் தேவை அதிகரிக்கக்கூடும் என்பதால், மின் விநியோகத்தைச் சீராகப் பேணுவது சவாலாக அமையலாம் என அவர் தெரிவித்துள்ளார்.

குறிப்பாக, காலை 7 மணி முதல் இரவு 9 மணி வரையிலான அதிக மின்சாரத் தேவை காணப்படும் நேரங்களில், நாட்டின் மொத்த மின்சாரத் தேவையைப் பூர்த்தி செய்யப் போதுமான மின்சாரம் கிடைக்குமா என்பது குறித்து நிச்சயமற்ற நிலை காணப்படுவதாகவும் அவர் சுட்டிக்காட்டியுள்ளார்.

எண்ணெய் மற்றும் டீசல் மூலம் இயங்கும் மின் உற்பத்தி நிலையங்களை முழுமையாக இயக்கினாலும், அதிகரிக்கும் மின்சாரத் தேவையை முழுமையாகப் பூர்த்தி செய்ய முடியுமா என்பது கேள்விக்குறியாக இருப்பதாக அவர் குறிப்பிட்டுள்ளார். அவ்வாறான மாற்று மின் உற்பத்தி நடவடிக்கைகள் அதிக செலவுகளை ஏற்படுத்துவதுடன், அதன் சுமை இறுதியில் பொதுமக்கள் மீது விழக்கூடும் என்றும் எச்சரித்துள்ளார்.

எனவே, நுரைச்சோலை மின் உற்பத்தி நிலையம் மீண்டும் வழமைக்குத் திரும்பும் வரை, மின்சாரப் பற்றாக்குறையைச் சமாளிப்பதற்கும் விநியோகத்தை முறையாக நிர்வகிப்பதற்கும் அரசாங்கம் உடனடி நடவடிக்கைகளை முன்னெடுக்க வேண்டும் என அவர் வலியுறுத்தியுள்ளார்.

மேலும், இவ்வாறான மின் உற்பத்தி நிலையச் செயலிழப்புகள் இதற்கு முன்னரும் ஏற்பட்டுள்ளதாகக் குறிப்பிட்ட அவர், அவற்றுக்கான காரணங்களைக் கண்டறிந்து எதிர்காலத்தில் இத்தகைய பாதிப்புகளைத் தடுப்பதற்குப் பல்வேறு நிறுவனங்கள் ஆய்வுகளை மேற்கொண்டு பரிந்துரைகளை வழங்கியுள்ளதாகவும் தெரிவித்துள்ளார்.

எனினும், அந்தப் பரிந்துரைகள் உரிய முறையில் நடைமுறைப்படுத்தப்படாததே இத்தகைய பிரச்சினைகள் மீண்டும் மீண்டும் ஏற்படுவதற்குக் காரணமாக இருக்கலாம் எனத் தெரிவித்த அவர், இந்த விவகாரத்தில் பொறுப்புணர்வு போதிய அளவில் கடைப்பிடிக்கப்படவில்லை என்றும் சுட்டிக்காட்டியுள்ளார்.